මෑත කාලයේ රංගන ක්‍ෂේත්‍රයට පැමිණි රංගන ශිල්පිනියන් අතර ෂෙරිල් ඩෙකර් සුරූපිනියක්. ෂෙරිල් සමඟ එකතු වුණේ ඇයගේ සුරූපී බවේ රහස් ඔබට කියන්න. අපි ඇයගෙන්ම විස්තර අහමු.
• ෂෙරිල් උපතින්ම ලස්සන කෙනෙක්ද? එහෙම නැත්නම් පසුව ලස්සන හදාගත්ත කෙනෙක්ද?
අනේ මම ලස්සන හදාගත්තේ නැහැ. උපතින්ම ලස්සනයි. හැමෝම කිව්වේ මම පොඩි කාලේ ඉඳලම ලස්සනයි කියලා.
• ෂෙරිල්ගේ අම්මත් ෂෙරිල් වගේද?
ඔව්. ඇයත් ගොඩක්ම ලස්සනයි.
• අම්මගෙන් ඔයාට ලැබුණු ලස්සනම දේ මොකක්ද?
අම්මගෙන් මට ලැබුණු ලස්සනම දේ එයාගේ ආදරය.
• මෑත කාලයේ ක්‍ෂේත්‍රයට පැමිණි නිළියන් අතර ඔයා ගොඩක් ලස්සනයි නේද?
මම විතරක් නෙවෙයි හැමෝම ලස්සනයි. හැමෝටම විවිධාකාර ලස්සනක් තියෙනවා.
• ඔයාගේ අහිංසක පෙනුම ඔයාට ලැබුණු චරිත නිසා ගොඩනැඟුණු දෙයක්ද නැතිනම් උපතින්ම ලැබුණු දෙයක්ද?
මම අහිංසක නැහැ. අහිංසක පෙනුමක් තිබුණට මම ගොඩක් වස කෙනෙක්.
• ඔයාගේ ශරීරයේ ලස්සනම අංගය මොකක්ද?
එහෙම විශේෂත්වයක් නැහැ. මට හැමෝම කියන්නේ දිගු දෑස කියලා.
• ෂෙරිල්ට ලස්සන කොණ්ඩයක් තිබෙනවා නේද?
මේ දවස්වල කෙස් ගැලවෙනවා. ඒ නිසා කොණ්ඩේ ටිකක් කැපුවා. මම ගොඩක් ආසයි කොණ්ඩේ කලර් කරන්න. ඩැමේජ් නිසා තැඹිලි තෙල් ගාලා කොණ්ඩේ හොඳට බලාගන්නවා.
• ලස්සන වෙන්න නිවෙසේදී මොනවද කරන්නේ?
මම සැර කන්නේ නැහැ. මම ගොඩක් කැමැති වට්ටක්කා කන්න. රුවන් මට කියන්නේ වට්ටක්කී කියලා. ඒ වගේම කොමඩු, අඹ, ස්ට්‍රෝබරි පලාවර්ග කන්න කැමැතියි. ගොඩක් අය කරවිල, පතෝල, කොස්, පොළොස් කන්න කැමැති නැහැ. ඒත් මම මේවා ගොඩක්ම කනවා. මම නිතරම උයන්නේ මේ වගේ එළවළු.
• ෂෙරිල් සැලුන් යනවද?
ඉස්සර නම් සැලුන් ගියේ නැහැ. ඒත් දැන් දිගටම යනවා. ෂූටින්වලදී මේකප් කරන නිසා බ්ලැක් හෙඩ්ස් වැනි දේවල් එනවා. ඒ නිසා ක්ලීනප් එකක් කරගන්න සැලුන් යනවා.
• ෂෙරිල්ට පෙම් යෝජනා එහෙම එන්නේ නැද්ද?
යෝජනා නම් ඕනෑතරම් එනවා. මම හැමෝත් එක්කම හොඳින් කතා කරනවා. සීමාව පැන්නොත් මම බනිනවා. ඒ වගේම මම විවාහකයි කියලත් කියනවා. මට රුවන්ගෙන් ලැබෙන ආදරය හොඳටම ඇති.
• ඇඳුම් හැර වෙනත් විලාසිතා මොනවද?
මම ඔරලෝසුවලට කැමැතියි. මම පිටරට ගියාම හැම රටකින්ම වළලු ගන්නවා. ඒ වගේ එකතු කර ගත්ත වළලු සෙට් එකක්ම තියෙනවා.
ලයනි රසිකා නිරෝෂිණී
